Неделя молитвы в Бутырской тюрьме СИЗО-2 Москвы
Шестой день: О сотрудниках уголовно-исполнительной системы
(молитва о сотрудниках учреждений уголовно-исполнительной системы (УИС), курсантах учебных заведений ФСИН России, ветеранах УИС, а также всех работниках правоохранительных органов – Судопроизводства, Следствия, Прокуратуры и Полиции Министерства внутренних дел (МВД).
Евангелие от Луки, зач.111 ( гл. 23 стих 32-49)
Ведяху же и ина два злодея с Ним убити. И егда приидоша на место, нарицаемое Лобное, ту распяша Его и злодея, оваго убо о десную, а другаго о шуюю. Иисус же глаголаше: Отче, отпусти им: не ведят бо что творят. Разделяюще же ризы Его, метаху жребия. И стояху людие зряще. Ругахуся же и князи с ними, глаголюще: иныя спасе, да спасет и Себе, аще Той есть Христос Божий избранный. Ругахуся же Ему и воини, приступающе и оцет придеюще Ему, и глаголаху: аще Ты еси Царь Иудейск, спасися Сам. Бе же и написание написано над Ним писмены еллинскими и римскими и еврейскими: Сей есть Царь Иудейск. Един же от обешеною злодею хуляше Его, глаголя: аще Ты еси Христос, спаси Себе и наю. Отвещав же другий прещаше ему, глаголя: ни ли ты боишися Бога, яко в томже осужден еси? И мы убо в правду: достойная бо по делом наю восприемлева: Сей же ни единаго зла сотвори. И глаголаше Иисусови: помяни мя, Господи, егда приидеши во Царствии си. И рече ему Иисус: аминь глаголю тебе, днесь со Мною будеши в раи. Бе же час яко шестый, и тма бысть по всей земли до часа девятаго: и померче солнце, и завеса церковная раздрася посреде. И возглашь гласом велиим Иисус, рече: Отче, в руце Твои предаю дух Мой. И сия рек издше. Видев же сотник бывшее, прослави Бога, глаголя: воистинну человек сей праведен бе. И вси пришедшии народи на позор сей, видяще бывающая, биюще перси своя возвращахуся. Стояху же вси знаемии Его издалеча, и жены споследствовавшыя Ему от Галилеи, зрящя сия.
Сугубая ектения:
О еже даровати Отечеству нашему мир, тишину и благоденствие, да всякое преступление: ненависть, вражда, убийство, татьба и иные всепагубные действия да упразднятся, и да утвердится в народе нашем трудолюбивое, трезвенное и целомудренное житие, рцем вси: Господи, услыши и помилуй.
О еже призрети милостивным оком на христолюбивых воинов, в темницах службу носящих, и посетити их милостию и щедротами Своими, Господу помолимся.
О еже, по слову Твоему, важнейшее в хранении закона: суд (справедливость), милость и веру ( Мф. 23,23) в сердцах рабов Своих, воинов темничных, утвердити, и страхом своим от всякого злаго обстояния оградити, и на путь добродетели наставити, Господу помолимся.
Молитва
Боже Великоименитый, в руце Своей содержаяй судьбы народов и концы земли, от Негоже всякое Отечествие именуется (Еф3,15), призри на страну нашу и всех людей ея, да всякое греховное нестроение: ненависть, вражда, бийства, нечистота, хищения, смертоубийства и иные тьмочисленные преступления да прекратятся, благочестие же и правое житие да утвердится в людях земли Российския.
Боже, Спасителю наш, призри милостивным оком на воинов, в темничных узилищах служение совершающих, и наказания и исправления, от судов человеческих утверждаемых, над узниками исполняющих! И якоже помиловал еси сотника Лонгина, пред Крестом Твоим предстоящего, и даровал ему познание и исповедание Тебе, истиннаго Сына Божия, тако и рабом Твоим сим подаждь познание Тебя Единого Истиннаго Бога, и по заповедям Твоим служение их исправи. И якоже помиловал еси в Филиппах Апостолом Павлом стража темничнаго, и весь дом его Святым Крещением просветивый, тако и сим блюстителям узников подаждь освящение в Таинствах Церкви, и покров державный благодатнаго освящения Твоего. И якоже в притче Благовествования о Страшнем судище верныя рабы Твоя, в темницу пришедшия, и в заключенных Образ Твой невидимо познавшия, и тако Тебе, Христе, послужившия, сице и сим рабом Твоим, по правде законной служение узникам совершающим, и образ Божий во всяком человеце достойно чтущим, и милостивное сердце не затворенно имеющим, подаждь в веце сем досточестно пожити, и на Страшном суде одесную Тебе стати да сподобиши, и блаженный глас Твой, Владыко Христе, услышати: «Приидите, благословеннии Отца Моего, наследуйте уготованное вам Царствие от сложения мира». Аминь.