Благословен Бог наш… Царю Небесный… Бог Господь…
Тропарь, глас 2.
Манассию от уз и горького заточения, / молитв ради свободивый Всещедрый Боже, / и рабы Твоя в покаянии Тя призывающих и молящихся, / от уз и заточения свободи, / и от всякого злаго обстояния избави, // яко Един Человеколюбец.
Слава : Правило веры и образ кротости…(Тропарь Святителю Николаю)
И ныне : Милосердия двери отверзи нам…
Слава тебе, Боже наш, слава Тебе.
Пресвятая Богородица, спаси нас.
Святителю отче Николае, моли Бога о нас.
Слава, и ныне.
Запевы повторяются три раза.
Избави от бед и скорбей раб Твоих, Владыко Всемилостиве, / яко мы усердно к Тебе прибегаем, // Милостивому Избавителю, всех Владыце, Господу Иисусу.
Спаси от беды рабы Твоя, Богородице, / яко мы усердно к Тебе прибегаем, // яко к Нерушимей Стене и Предстательству.
Моли Бога о нас, святителю отче Николае…
Прокимен,глас 7.
Изведи из темницы душу мою, / исповедатися Имени Твоему.
Стих: Вонми молитве моей, яко смирихся зело.
От Иоанна (Глава 8, стихи 31-36)
Рече Господь к веровавшим Ему иудеом: аще вы пребудите во словеси Моем, воистину ученицы Мои будете. И уразумеете истину, и истина свободит вы. Отвещаша и реша Ему: семя Авраамле есмы, и никомуже работахом николиже: како Ты глаголеши, яко свободни будете; отвеща им Иисус: аминь, аминь глаголю вам, яко всяк творяй грех, раб есть греха. Раб же не пребывает в дому во век: сын пребывает во век. Аще убо Сын вы свободит, воистину свободни будете.
Кондак, глас 5-й.
Яко милосердия источник, / и благочестия пучина, Христе Боже,/ не презри в скорбех и бедах, Тя верою призывающих,/ но яко Щедр помилуй,/ и во узах от всякого зла сохрани,// да поем Ти: аллилуия.
Запевы повторяются три раза.
Не имамы иныя помощи..
Сугубая ектения: Помилуй нас, Боже…
О Патриарсе и властех…
Приложи и сия:
Еще молимся Господу Богу нашему о еже посетити милостию Своею в темницах пребывающих, греховными узами связанных, во еже оставити зломыслие греховное, и в покаянии обрести надежду и свобождение, Христом и Спасителем нашим даруемое, прилежно молимся, Господи, услыши и милостивно помилуй.
О еже просветити умы и сердца во узилищах сидящих светом благодати Своея, во еже отложити всякое намерение греховное, и работу греховным навыкам упразднити, последовати же повелениям Твоим, прилежно молим Тя, Господи, услыши и помилуй.
Исцеляя болезни, врачуя страсти, посети благостию Твоею в темнице сидящих, сохраняя их от всякого недуга и немощи, от духа злобы и уныния, плотскаго сластолюбия и пиянства, да во всякой целости обрящут путь, угодный Тебе, Истинному Богу нашему, прилежно молимся услыши и яко Щедр, помилуй.
Услыши ны Боже…
Молитва о заключенных
Господу помолимся; Господи, помилуй.
Господи Иисусе Христе Боже наш, Крестом во ад сошедый, диавола посрамивый, заклепы и вратницы адовы разрушивый, узники свободивый и жизнь миру Твоему даровавый, призри на молитву смиренных и недостойных раб Твоих, ко Твоему Величеству бесприкладному и бездне человеколюбия прибегающих и яко Благосерд Твоею милостию и щедротами посети грехми обремененныя и в заключении темничном сущия: Ты бо рекл еси, Господи, яко хотением не хощу смерти грешника, но еже обратитися и живу быти ему. Услыши в скорби и тесноте душевной призывающих Тя: в немощи находящихся душевныя и телесныя раны уврачуй; в ожесточении сердечном сущия к покаянию обрати; правды и оправданий Твоих ищущих в вере и творении заповедей утверди и на путь спасения настави. Ты бо еси, Господи, помощь беспомощным, надеждо ненадежным, спасение отчаянным, всем вся буди и приведи ко пристанищу хотения Твоего. Да поем и славим Тя со Безначальным Твоим Отцем, и Пресвятым, и Благим и Животворящим Твоим Духом ныне, и присно и во веки веков. Аминь.
Молитва ко Святителю и Чудотворцу Николаю.
О всесвятый Николае, угодниче преизрядный Господень, теплый наш заступниче, и везде в скорбех скорый помощниче! Помози мне грешному и унылому в настоящем сем житии, умоли Господа Бога даровати ми оставление всех моих грехов, елико согреших от юности моея, во всем житии моем, делом, словом, помышлением и всеми моими чувствы; и во исходе души моея помози ми окаянному, умоли Господа Бога, всея твари Содетеля, избавити мя воздушных мытарств и вечного мучения: да всегда прославляю Отца и Сына и Святаго Духа, и твое милостивное предстательство, ныне и присно и во веки веков. Аминь.